واش يصبّر خاطري علّي بيّا **** جرح الوالدين يا المهدي مقساه
أقراها تلقاها القصّة مفريّا **** أرجع للتّفسير واتمعّن معناه
زهو الدنيا ياك بيهم يا خويا **** واذا صدّوا قول تمرار الدنيا
هذه الدنيا راه حالك شيّبني **** واللّي شفتو فيك ما قدرت انخبّيه
من طبعي صبّار والهم غلبني **** عدت انحوّس على الصبر ماني لاقيه
دار العجزة أمرك حيرني **** وين النّيف وين ناسو وامّاليه
يا لايم بالله لاتلوم **** راها كثرت عني هموم
والأمر اللي شفتو اليوم **** راني متحيّر بيه
شافت عيني واحد العجوز **** في دار العجزة تروج
كلّي هارب بها الموت **** بحرو ما قدرت ليه
قلت للميمة واش بك **** هذه حالة ما تليق بك
قولي واش اللّي صار ليك **** وين اللّي ربيتيه
سالت دمعتها على القمام **** والقلب تقطّع يا سلام
سكتت راح عليها الكلام **** ما قدرت تنطق بيه
شافتني شوفه حادة **** جرحتني ماهي قاصدة
معنى للّي عندها غدا **** والدنيا غرّت بيه
قالت لي حال اللّي يفيق **** يلقى روحو وسط طريق
لا ذريّة ولا صديق **** لامن يتهلّى فيه
يا خوتي ماننسى نهار **** ركّبني ولدي في الكار
وصّلني قال هذه الدار **** فيها ما تتمني
لوّحني فيها يا خوان **** اتبلينا واللّي كان كان
من ساعتها ما زاد بان **** قلبو راه مقسّيه
أيّامي رجعولي مرار **** كي هجروني ذوك الصغار
ما خافوا ما حشموا بعار **** الحساب يكون لهيه
كنشبع أنا ما كليت **** كنزهى أنايا بكيت
كننسى أنايا مانسيت **** راني نستنّى فيه
حبّيت نشوفو يا الخوت **** قدّام ما تغصبني الموت
خايفه هذه الفرصة تفوت **** وانموت بعيدة عليه
يا لايم بالله لاتلوم **** راها كثرت عنّي هموم
والأمر اللّي شفتو اليوم **** راني متحيّر بيه
واذا متنا يا سامعين **** قولولوا رانا مسامحين
يا ربّي رانا طالبين **** في الدنيا تغفر ليه
قلنا ربي يحسن العون **** كيفاش الوالدة تهون
كيفاش الولد رجع يخون **** ويلوّح والديه
اتفكّر يا نكّار الخير **** مزيّتها وانت صغير
غدوا الله عندك اتدير **** عيبك باه تغطّيه
ماذا ورّاتك من دلال **** والله غالب تبدّل الحال
عدت توصّفها بالهبال **** وتعاير فيها بيه
هذه هي حالة الجيل **** من طبعو نكّار جميل
يا حسره على رجلة قبيل **** وين النّيف وين امّاليه
لمخيّر قال انا عييت **** لمراه حكمت وأنا رضيت
روحوا خلّوا لي البيت **** وحدي نتمتّع فيه
يا لايم بالله لاتلوم **** راها كثرت عنّي هموم
والأمر اللّي شفتو اليوم **** راني متحيّر بيه
مادام الأم شافتها **** ما هزّتها غير بنتها
وحدة عاشت عند اختها **** الاخرى راهي في طريق
هذا هو حال الزّمان **** خدّاع وماعندو أمان
وكيف يضحكلك يا فلان **** عندك لتامن بيه
أيام العزّة ما تدوم **** راها تعكسلك بالهموم
واللي يفرح بها اليوم **** ترجعلو وتبكيه
يا لايم بالله لاتلوم **** راها كثرت عنّي هموم
والأمر اللّي شفتو اليوم **** راني متحيّر بيه
استغفر للمولى وتوب **** قدّام ما تتسد الدّروب
واذا ما صفّيت القلوب **** ربّك باه تلاقيه
الدّنيا ما فيها حساب **** بعد الصّح يجيك السّحاب
غدّارة ماليها أصحاب **** من يمّنها تدّيه
من ذي الشّوفه يا سامعين **** أيوب راه اصبح حزين
جاب كلامو للفاهمين **** واللّي يتمعّن فيه
يارب تقبل بالكلام **** واغفر للّي جاب النّظام
واتفكّر يوم الزّحام **** أيوب ووالديه
يا لايم بالله لاتلوم **** راها كثرت عنّي هموم
والأمر اللّي شفتو اليوم **** راني متحيّر بيه
ولتحميل القصيدة في ملف Word اضغط على الرابط التالي
دار الـــعـــجـــزة
