توّك صغيره وابتديتي تحبين
من علّمك ليل السهر ياصغيره ؟
.
.
بدري عليك العشق يابنت هاللحين
حرام هذا القلب وشهو مصيره ؟
.
.
أنتي بريئه في الهوا ليه تشقين ؟
دروبه طوال ٍ عليك وعسيره
.
.
رحتي بدرب ٍ ماله اصلا ً عناوين
وأنتي مشاويرك من أول قصيره
.
.
ياطفلة ٍ حبّت وراحت على وين ؟
عقب الهنا ذقتي الحياه المريره
.
.
وينك ووين الحب والشوق والبين ؟
عنّيتي عيونك وصرتي سهيره
.
.
امحق تسلّي كان ودّك تسلّين
الورد لولا اللّون وشهو عبيره ؟
.
.
خلّيتي دروسك وصرتي تحاتين
الدرس في ديره وصرتي بديره
.
.
وصرتي بعد من غير هذا تغارين
والمشكله يابنت منتي خبيره
.
.
نصيحتي لك كان ودّك تردين
يم السعاده والحياه المثيره
.
.
خلّك بجو العايله لا تعدّين
ماما وبابا والعجوز الظريره
.
.
شيبانك اللّي مايبونك تعانين
من بينهم عشتي كأنـّـك أميره
.
.
الحب قبلك هز ناس ٍ كثيرين
وخلاّ القلوب تعيش هم ٍ وحيره
.
.
الحب يفضح لا انكشف داخل العين
وأنتي بنفــّسك ماهقيتك بصيره
.
.
طيعي كلامي واحذري لا تمادين
تراجعي لاعل في الأمر خيره
.
.
عيشي الطفوله والبراءه لك سنين
وبعدين حبّي لا غديتي كبيره
