همسة شوق من فمك

\
\
عديت في مرقبً ٍ والليل ممسينـي
بديار غرب ٍ ياعل السيل ما جاهـا

أضحك مع اللي ضحك والهم طاويني

طية شنون الطلب لو قطروا ماهـا

وراك ما تزعجين الدمع يـا عينـي

على هنوفً ٍ جديد اللبـس يزهاهـا

هبت هبوب الشمال وبردها شينـي

ما تدفي النار لـو حنـا شعمناهـا

ما يدفي الا حضن مريوشة العينـي

وإليا عطشنا شربنـا مـن ثناياهـا

أبو عيـونً ٍليـا سلهـم تناجينـي

يا قرد عين المشقى كيـف يقواهـا

يا شبه وضحى فتاةً ٍ دلهـا زينـي

داجت على عقلةً ٍ والورد....

خفض على صوت المسجل اول ماانتبه لجواله يدق,,طلع جواله من جيب بنطلونه
الاسود
ناظر الشاشه: الخوي يتصل بك
رد بهدوء على طبيعته عكس سرحانه:هلا محمد
محمد وهو متنرفز من برودته اهو يحاتيه وله ساعه يدق وهو بكل برود يرد:لا
والله ياشيخ
رائد وهو ضايق خلقه بس حس ان محمد متنرفز مو من عوايده حب يرفع ضغطه
شوي:اشفيك
محمد وهو بدا يعصب اكثر:سلامتك سلاااااااااامتك مافيه شي بس الظاهر لي ساعه
ادق عليك وماترد وينك فيه
رائد ببرود يقهر:موجود
محمد وبدا صوته يعلى شوي:لا والله ياشيخ ادري انك موجود اجل اكلم خيالك وين
ارضك هنا هناك قريب بعيد على الارض بالمريخ
رائد وهو يتحرك ويلتفت يمين:لا تحتها وش تبي
محمد بجد وقلةصبر:فال الله ولافالك اخلص علي العشاء والشرهه على اللي
يحاتيك
رائد وهو يوقف سيارته الاندلوفر السوداء تحت العماره لانه كان قريب
منها:خلصت!!!!عند العماره واقف
وصكر جواله قبل لايرد محمد


محمد يدرس الماجستير في المانيا وهو هالايام ينتظر اوراق وشهادة تخرجه وصل
رائد لالمانيا قبل اسبوعين لاجتماع مع احدى الشركات لاشراء اسهمها في شركة
العايله
وانتهى الاجتماع بكسب رائد اسهم الشركه من امام شركات منافسه
لهاساعتين تنتظره "روجينا"فتاه اميريكيه مقيمه في المانيا زميله لمحمد...
هذا هو جاء ناظرته بشوق ولهفه ماهمها نظرة الاستهزاء اللي ينظر لها بالعكس
محليته اكثر فوق جاذبيته وملامحه البدويه القاسيه وعيونه الحاده كحدة عيون
الصقر تحت هادبين اسودين فاحمين
اقتربت منه لاتستطيع مقاومة لمس جسده القاسي والمشدود وعضلاته البارزه
اول ماحطت يدها على يده اقشعر شعرجسمه وبلغ منه مبلغ الغليان والغضب مسك
يدها ودفها بقوه وعصبيه كأنها شي قذر وشرز
صكرباب سيارته بعصبيه ونفاذ صبر
:استغفرالله العلي العظيم
ومشى بعد ماقفل سيارته وهو يستغفر ويهدي نفسه
فتح باب الشقه ومعالم الغضب والعصبيه اللي كانت مسيطره عليه تلاشت وحل
محلها قناع الهدوء والبرود
هذا هو رائد يتحكم في نفسه دايما
اول مادخل وقبل يصكر الباب نقز محمد في وجه وعلى وجه ابتسامه صفراء
:لاتقول ماانتبهت اللي تنتظرك تحت
"قالها وهو يرفع حواجبه مغايضه لرائد يبي يطلعه من برودته"
صكر رائد الباب من غير مايرد على محمد ودخل المطبخ يغسل يديه
دخل محمد وراءه:اقول يارجال ورى ماعزمتها تذوق طباخي
التفت رائد على طول واول ماشاف محمد نظراته اللي تحرق:امزح امزح يارجال
يادافع البلا نار تحرق
طنشه رائد ودخل الصاله شافه محمد يجلس بكسل واسترخاء على الكنبه
:اقول ياشيخ ورى ماتحول علي كلش مايطقن خشتي وانا بس شاق الحلق ابتسامات
"واخذ صينيةالاكل وشالها" وانت ساحب عليهن وموكلهن تبن وطايحات عندك
ماتقولي وش سرك
"نزل الصينيه على الطاوله الصغيره قدام رائد وهو جلس مقابله"
رائد بعد ماسمى :اقول لاتسمعك اخت علي بس "ومد يده للاكل"
محمد ويرفع اكمام تي شيرته الرمادي ويحرك يده: لايابوك فكنا لاتطب علي
تراها عندها الحاسه السادسه
ابتسم رائد ولارد
اخذ جواله من جنبه ومده على محمد:من متى ماكلمت خالتي
محمد اخذ الجوال ويسوي نفسه يفكر:تقريبا من اسبوعين! .."سؤال اقرب منه
جواب"
رائد وهو يهز راسه"الله يخلف بس
محمد وهو يدق الرقم"ياخي مليت من محاضراتي امي اللي ماتخلص وانامتزوج بعد
بالله انت وولد خالك وش مسوين لامي
ابتسم رائد ولارد
وكمل محمد:ورى ماتسوي سواتهم ورى ماتمشي ممشاهم ورى ماتتعلم منهم ورى
ماتثقل ورى ماتتر...
:وانا صاااادقه
شهق محمد من الراعه:هلا يم
ناظر رائد اللي ميت ضحك عليه كان متوقع هالشي لان محمد نسى الاتصال وقام
يهذري
يضحك على شكل محمد وهو مغمض عين وفاتح عين ويتلقى التهزيئات من امه
محمد وهو يحاول يهدي امه المعصبه منه لانه نسى يدق عليها وهي اللي تحاتيه
كل يوم
:يمه الله يهدي..
:الل
:طيب اس
:خليني ات
:ان شا
:ان شاءال..
:ابشري ابش..
محمد وهو يناظر رائد اللي لهالحين يضحك وهوحايس البوز : ايه عندي
:طيب يالغاليه
ومد الجوال على رائد:ايه اضحك اضحك انت وخشتك
اخذ رائد الجوال ورد بجد ولهفه
:هلا والله وغلا بهالصوت ياهلا بهالريحه شلونك عساك طيبه بشريني عنك
:دوووم يارب طيب طاب حالك مانشكي بأس
علومكم واخبار الاهل وشلونهم
:اللهم ياجعله
:شلون صحتك اخذتي حبوب الضغط والسكر
:الحمدلله يفداك يالغاليه
:لاحرمني الله من هالريحه
:فديتك والله لاتحاتين تطمني الله يطمنك على غاليك
:لاوين الله يعافيك ماناخذ الا من بنات ديرتنا اصل وفصل وستر وعفه وجمال
ودلال
:فدوه لهن
:امين امين وشلون الربع كلهم
:لا مكلمهم اليوم ماعندي اغلى منكم
:والله موبيدي وانتي تعرفين وتعرفين شكثر انا مشتاق لديار ابومتعب
:لاخلى ولاعدم
:اجل اسلمي وسلمي وماتشوفي شر
:على راسي يالغاليه ابشري
:فمان الله يابعدي
وصكر الجوال وهو يناظر محمد اللي فاتح فمه
ابتسم:صكر بوابتك حنا على العشاء
محمد اللي انتبه لنفسه:نعنبو دار ابليسك بالع راديو انت
رائد وهو يكمل عشاءه:اذكرالله
محمد ويصب شاهي:لااله الا الله امي فالتها معك وانا حرف واحد ماخلتني انطقه
هنا ضحك رائد
محمد وهو ياخذ مفتاح رائد اللي بجنب الصينيه ويحذفه عليه: ايه اضحك اضحك
عاجبتك السالفه وانا المسيكين حق لطاش وهواش


في جهة الشرق وتحديدا في اطهر البقاع"بلاد الحرمين"
12ليلا
عاليه:والله اني مشتاقتله
سما:مين "وهي تتابع مسرحيه وتاكل فشار وحاطه رجل على رجل"
عاليه وهي تطلع فيلم وتدخل فيلم:مين يعني اخوك المطفوق
سما وهي تحذفها بالخداده اللي بجنبها:ماحد مطفوق الا انتي
صقعت الخدادة راس عاليه:آآآي ياتبنه
سما وهي تنزل فشارها:حتى اخوك واحشني
عاليه وهي تناظر الفلم اللي بيدها وتقلبه:الحين هذا وش جابه المغبر وش
مطلعه من الارشيف
سما وهي تجلس بجنب عاليه: اشوف.اها تايتنك
عاليه:هذا من عهد جدي عويض"جدها الخامس"
سما وهي تضحك:لاتسمعك مهبولته الجوري

:وش فيها الجــــــــــــــوري
عاليه وسما بخوف:يمـــــــــه
جوري وهي تتقدم منهن:شايفات جني ان شاءالله
عاليه ويدها على صدرها:من وين طلعتي انتي
جوري وهي تناظر الافلام المنثوره على الارض:من تحت الارض
سما بعصبيه:صاحيه والا مجنونه انتي
جوري بلامبالاه:وانا وش قلت"وانتبهت لفيلمها بيد سما": سموه عسى
بتحذفينه"بتهديد"
سما وهي تمده عليها:مو انا يالهبله هذي هي المطفوقه ناويه ترميه
جوري وهي تاخذ الشريط وحاطه يد على خصرها وتتوعد وتناظر عاليه اللي مسويه
نفسها بريئه:عاليــــــــــــــــوه
عاليه وهي تقصر صوتها وتأشر باصبعها على سما المنشغله بتجميع الافلام:هذي
المرجوجه
جوري عارفه عاليه زين مازين تقدمت منها وتسوي نفسها بتخنقها
جوري:انا ماحذرتك قبل ياالمط آآآآي
هلا بخبث:تستاهلين منقعتني تحت انتظرك وانتي مسفهتني وجالسه مع الخايسات
عاليه وهي تقوم الجوري من عليها:ماحد خايس الا انتي وبعدين مين اللي جابكم
جوري بعد ماوقفت نزلت عبايتها:مين يعني مافيه احد يعطينا وجه الا عمي خلودي
فديته
"واخذت الفلم وحطته بشنطتها
هلا وهي تقصر صوتها:جدتي نايمه
عاليه وهي تقلدها وتقصر صوتها:من زماااان
هلا وهي تضربها على راسها: طيب وراك تقصرين صوتك يالخبله
عاليه وهي تتربع وتحط الخداده بحظنها:اقلدك خخخخ
هلا وهي تتربع بجنبها:مالت عليك خخخخ
سما وهي ترفع الافلام بالدرج: لاتخخخين علينا انتي وياها وقوموا سولنا قهوه
نسهرعليها
عاليه:ماراح نسوي شي لين تتطلعين الجلكسيات اللي خاشتها عنا
الجوري وهي تناظر الحوسه:وهذا وشو هاه
عاليه:ياحليلك هذي الدبه آكلتها قبل اجيها
سما وهي تطلع باقي الاغراض:يالدوبه هذا انتي اصلا مادريت انك جايه الا يوم
شفت دولابي مفتوح وحايس "وتناظر الجوري": بنتك العوبا وينها
الجوري وهي تجلس معهم: ماحد عوبا الا انتي مخليتها عند خالتي
عاليه:وسلمان هناك
الجوري وهي تزين شعرها اللي انفك:يالغبيه لو انه هناك ماشفتيني عندك الحين


نرجع لمكان بعيد..
رائد وهو يسحب اللحاف عن محمد:يالثور قم خيست نوم
محمد وهويحك راسه وعيونه مغمضه:وش عندك من صباح الله خير
رائد وهو يفتح الشباك ويزيح الستاير:قم وش صباحه احنا الظهر الحين قم خيست
بالغرفه من البارح نايم
محمد وهومتملل على فراشه" وش من البارح ماصحيتني الفجر وصلينا وخليتني نجمع
اغراضنا وامر على الجامعه اخذ اوراقي وامر على صبري واسلمه سيارتك"صبري في
الخمسين من عمره امين مكتبه يتعامل معها محمد مقيم في المانيا من30سنه وهو
مصري كان يرافق ويسامر ويواسي محمد في غربته" ياخي مارقدت الا قبل شوي
ارحمني الله يرحم والدينك
رائد:الحين بدال الهذره كلها ورى ماتقوم تسوي لنا غداء وانا بخلص اشغالي
محمد عرف مافيه فكه منه وقام يغسل:متى طيارتنا
رائد وهو يطلع من الغرفه: بكره العصر
محمد وهو ياخذ فوطته: انا داري هالحنه كلها عشان بنرجع بكره مافيك صبر انت
خلنا نتبرد ايام وش معجلك على الحر
رائد وهو يرجع عشان ياخذ ملفه اللي نساه:يازينها ويازين حرها مشتاق لديره
والمزرعه
محمد وهو يدخل الحمام"الله يكرمكم":مافيك طب انت بدوي ماتجوزلك الحضاره
رائد وهويتصفح الملف: وافتخر والبداوه راس مالي وماراح ابدلها بحضارتك اللي
تعرفها
محمد وهويطلع وينشف وجه: والله ماذبح الشقراوات الا كبرياءك وعزة نفسك
وعلياك يالبدوي والله اني ارحمهن
صكر رائد الملف وكوره في يده وطلع من الغرفه: يالرحيم اخلص بس


نرجع لمملكتنا وتحديدا بيت ام سليمان...
فتح سلمان باب الصاله وهو يشوف امه جالسه على الكنب وتتقهوي دخل ونزل شماغه
وعقاله وطاقيته على كتفه:سلام يالغاليه " ويحب راس امه"ويجلس جنبها
ام سلمان بحنيه:وعليك السلام يابعدي تغديت وانا امك ترى مخلين لك غداء
سلمان بحنان:لا الله يخليك لي متغدي"ويتسند على ظهرالكنب وباين التعب عليه"
ام سلمان وهي تتلمس وجه ضناها: تعبان وانا امك
مسك يدها وباسها: لاوالله مافيني الا العافيه تعرفين شغلنا"ضابط في قوى
الامن الخاص"
ام سليمان بحب:الله يحرسك ويحميك ويحفظك لي ولامرتك وبنتك
سلمان باابتسامه صادقه:لاخلى ولاعدم"وهويلتفت يمين صوب المطبخ":الا فاطمه
وينها لاحس ولاخبر
"شغلتهم الهنديه لها20سنه عندهم"
ام سلمان وهي ترشف من فنجالها:بتجيك الحين بعلوم الحاره كلها
ضحك سلمان:والله تصلح نشرة اخبار هذي

في بيت ام علي...
زهور وهي تمسح دموعها: يمه مايكفيه اللي سواه فينا جاي يهاوش ويصارخ بعد"
وتجلس على الكنب بتعب"وكله من شأن السوسه حسبي الله عليها "واخذت السماعه"
انا بعلم محمد خله يشوف له صرفه
ام علي"هنادي"وهي تسحب السماعه من بنتها وتنزلها:لا وانا امك تبين تقلقين
رجلك ويتهاوش مع ابوك
زهور من سمعت طاريه وقفت وهي تصارخ:ماهو ابوي ماهو ابوي ابوي مات مات من
خذاها خذاها الموت ان شاءالله"وركضت لغرفتها"
جلست ام علي بوهن وهي تمسح دموعها:حسبي الله ونعم الوكيل
"وهي تنزل الدرج ومرتابه"رحاب وماسكه بطنها:خير ياخاله وش فيها زهور
ام علي:الله يهديك يابنتي وش منزلك من غرفتك الدكتور موقايلك لاتتحركين
كثير
رحاب وهي تجلس جنب ام رجلها:ماعلي انا الحين في السابع مافيه شر ان شاءالله
الا ياخالتي عمي كان هنا
ام علي بتنهيده:ايه الله يهديه بس والله اللي احنا فيه ذنب ولدي رائد اللي
اهملته وفضلت ابوعلي عليه تخليت عنه وهو ابوشهرين حرمته مني ومن حظني وقسيت
عليه وفضلت علي وزهور عليه"وتمسح دمعتها وتكمل بصوت مخنوق":مايناديني الا
ام علي وزهور يقولها ياخت علي ماعمري سمعته يقول يمه والا اختي والا اخوي
علي القسا اللي فيه انا السبب فيها انا اللي زرعت فيه الجفا وهذا حصاد
يديني ابوي وامي الله يرحمها سامحوني وهو لا"وخنقتها العبره"ضمتها رحاب:
الله يهديه ان شاءالله ياخاله رائد طيب وحنون بس مجروح ياخاله خلي الايام
تداويه وان شاءالله يلين قلبه عليكم الله كريم ياخاله الله كريم

قبل 30سنه
ام سيف بصدمه:وتخلين ولدك
هنادي بتهور:يمه مشعل مايبيه خيرني بين ولدي وبينه وش تبيني اسوي اضيع
شبابي وعمري عليه بكره بيتزوج ويخليني ماراح ينفعني الا الرجال وعيال واجد
اجيبهم يرعوني لراح واحد عندي الثاني
"وتمد ولدها على امها" خذيه وربيه رحت لجده"تقصد ابورجلها المتوفي فيصل"
وطردني كارهني عشان ولده عصاه ومخذ بنت اخوه والحين مايبي الولد
اخذت ام سيف الطفل بحب ورحمه عليه وحزن وباسته
هنادي بوقاحه:خذيه وربيه مع بناتك اللي ابوي فضلهن وحبهن اكثرمني موكأني
بنته العوده
ابوسيف وهو طالع من غرفته يبي يطلع للمسجد معصب :بنتي العوده عصتني وتزوجت
غصب عني رفضت ولدعمها المحيره له واللي شاريها وباغيها فشلتني في الرياجيل
وخلتني بيزه مااسوى
هنادي بوقاحه اكثر:اووهووو
"وهي تطلع"مع السلامه مشعل يحتريني
ابوسيف وهويطلع من الصاله:حسبي الله ونعم الوكيل
ام سيف بحزن وقهر:انا لله وانا اليه راجعون الشكوى لك ياربي رحمتك ولطفك
وسترك دنيا وآخره وضمت حفيدها لصدرها بحنان ..


قبل واحدوثلاثين سنه
"فيصل حط ابوه امام الامر الواقع"
في احد ايام عيد الاضاحي
فيصل لابوسيف وكان ابوه حاضر واخو ابوسيف"ابوسعد" وولده سعد
ابوسيف:عسى ماشر ياولدي وش عندك مجمعنا
فيصل وهومتردد بس لازم يتكلم بنت خالته هنادي دخلت في وجه انه يفك حبلها من
ولدعمها سعد
:طال عمرك دخلت في وجهي دخيله وانا قبلت وماراح تطلع من وجهي لين اعطيها
حبالها من ولدعمها
هنادي تبي حبالها ياسعد وبتعطيها غصب والا رضى منك"وهو يناظر ولدعمها
بتحدي"
الكل انصدم وماتوقعو هنادي تسوي كذا وماتوقعو طلب فيصل وتحديه
انفجر سعد يصارخ ويتوعد ويحلف مارا يخليها ولاراح يفك حبالها مهما كان عصب
فيصل وبغى يتضارب مع سعد بس ابوه مسكه لايتهور وابوسعد طلع ولده من المجلس
بالقوه وهومعصب وقال لابوفيصل ياخوي من باعنا بعناه ولوكانت بنت اخوي وجاك
حبالها يافيصل والله يسترعليها..وطلع مع ولده اللي الشرر يتطاير من عيونه
وتقدم فيصل لهنادي لان ابوها حالف عليها ليزوجها اول واحد يتقدم لها كائن
من كان
هنادي بحركتها هذي فرقت بين اكثر من شخص بين سعد وابوه واخوانه سافر لكويت
وخلى الديره
وبين ابوسعد وابوسيف وظل ابوسعد زعلان وشارهن على اخوه
وبين فيصل وابوه اللي طردته من البيت لان اخو ابوفيصل"ابوقمرا" اول ماسمع
بخطبةفيصل لبنت خالته زعل على اخوه وهم اللي محيرين قمرا بنته الوحيده
لفيصل
وماتصافت النفوس الا بعد سنه بعد ماتوفى فيصل في حادث دهس وهنادي حامل في
شهرها الاخير
بس بقى ابوفيصل محمل هنادي موت ولده



"العوايل كثيره هنا ومتشابكه وراح تلخبطون وعشان كذا راح اعرفكم فيهم..ام
فيصل وام سيف وام مازن وابوطايل وابومشاري وابوسمير اخوان.. وذولي لهم عيال
وبعضهم لهم احفاد..
ام فيصل الحين جده عيالها 1فيصل:"ابورائد متوفي"
و2حصه:ام"سلمان-منيف-عاليه" مطلقه
و3 ريوف:ام"نايف-فهد-سما"
ارمله
4مزنه:ام"جوري-هلا-هيثم-ياسر"
5خالد آخر العنقود مطلق عمره30سنه
...
ام سيف الجده متوفيه الله مارزقها باولاد بس ينادونها بام سيف على ابورجلها
بناتها5"1هنادي:ام رائد من فيصل رجلها الاول وعلي زهور من رجلها الثاني
مشعل
2حنان"ام محمد"
3دلال متزوجه ومعها ولدين"مازن6سنوات ويزن3سنوات
4ليلى متزوجه معها شروق4سنوات وحامل
5ساره آخر العنقود متزوجه لهاشهرين
....
ام مازن الجده متوفيه:لهاثلاث بنات ومازن30سنه
1وضحا:ام"سهير-البندري"
2هيله:ام"طلال-شوق-تهاني-طارق"
3سلمى:ام"رعد-فياض-يزن"
....
ابوطايل
زايد:عياله"طايل-منيره-عامر-نوره-نوير-نوري-براك"
....
ابومشاري
ناصر:عياله"مشاري-روعه-شهد"
....
ابوسمير
حامد:عياله"سمير-سامر-منى-ليالي"
وراح تتعرفون عليهم اكثر في الاحداث الجايه....


نرجع الى ارض الواقع

بيت ابوسيف
في الصاله
ساره بصوت عالي:يبــــــــــــــــه
انتفض ابوسيف مزعوج:بسم الله الرحمن الرحيم وش فيك عسى ماشر
ساره وهي تحط بيالة الشاهي في يد ابوها:يبه انت اللي وش فيك لي ساعه وانا
اناديك وماده عليك البياله
ابوسيف وهويمسك البياله زين ويرفعها يبي يشرب وهومبتسم
ساره وهي رافعه حاجبها الايمن وحايس بوزها:دامك تبتسم اجل كنت تفكر برائد
صح
ضحك ابوسيف عليها وهي ماده البوز غيرانه:ذكيه على ابوك ايه كلمني قبل شوي
وطيارتهم على ثمانيه الليله ان شاءالله
نقزت ساره تضم ابوها مبسوطه"على الرغم انها هي خالةرائد بس تقريبا رائد
مربيها وهي دلوعته من بين خالاته كلهن بينهم تقريبا10سنوات"
:قل واللـــــــــــــه
ابوسيف بشويةحزم:بنـــــــــــــــت
ساره وهي تحب راس ابوها:آسفه يالغالي من الفرحه بجيته مابغى
ضحك ابوسيف:اللي يسمعك مايقول هذي اللي كل شوي تشتكي منه
ساره وهي ترجع تجلس:تبي الصراحه ولدك حبوب بس يرفع الضغط احيانا هو وآوامره
ومطالبه لاتروحين لاتجين لاتسوين اقعدي وشوله مافيه ليش وش حقه ينرفز
ماكأنه معقد شوي يبه"وهي تبي تكسبه في صفه"
ضربها ابوها خفيف على راسها: ياللي ماتستحين تقولين على ولداختك معقد
ساره وهي تحك مكان الضربه مسويه انها توجع:هذا انت قلتها يعني انا خالته
ومع كذا اللي يشوفنا يقول هو الخال
ضحك ابوسيف:لانه اكبرمنك ومربيك ويعرف مصلحتك اكثر منك
ساره وهي تقوم تبي تنحاش: ايه من يشهد لذيب الا...وقبل لاتكمل مسك ابوها
عصاه مسوي نفسه معصب بيضربها وهنا حطت ساره رجلها
ضحك ابوسيف على خبال بنته مهماكبرت وتزوجت ماراح تعقل


ابوسيف انسان شديد وحازم بس طيب وحنون ربى "رائد" ولد بنته على علوم الرجال
والصبر والجد والكفاح والشجاعه والطيب والكرم
وماخيب ظنه رائد اللي الكل يناديه الشيخ لهيبته ورزته وثقله وكلمته اللي
مايثنيها ومواقفه الرجوليه وقلبه الطيب الحنون
ماسك شركةالعائله مع عيال خالاته وخواله
انسان جدي وقت الجد يعتبر طايل ولدخاله تؤم روحه لانهم نفس الطباع ونفس
الطول والجسم والرزه والهيبه والثقل والثقه وعزة النفس


"راح تتعرفون على طايل في البارتات الجايه"


رجعت ووقفت على راس ابوها وهي تفرك يدينها مستحيه:يبه
ابوسيف عرف وش تبي من حياها واستحاها وضحك: مايمديه وانا ابوك ماله الا
اسبوع من راح
استحت ساره اكثر:وش اسوي
ابوسيف وهو مازال يضحك: لاتسوين شي احتري رجلك لين يجي ماهو مطول دوره شهر
مانك معيه لاتروحين معه
ساره وهي تجلس بجنب ابوها وتصب لنفسها شاهي:الا
ابوسيف وهويكمل شرب بيالته: خلاص اجل لاتهذرين على راسي وتشكين
ساره وهي مبوزه:طيب ماالله عطاني حب السفر برى السعوديه