زادت جروح المحبه وابتدى نزف العتاب
للعشيق الي تناسى أو نسى عشرة عشيقه

كيف جا له قلب يبعد ويتمادى بالغياب
كيف يتركني بين هم وبين ضيقه

أيه أنا ضايع بدونه بالذهاب وبالأياب
والطريق اللي مشيته للاسف ماهو طريقه

مره أشعر به حقيقه واتفاجأ به سراب
ومره أشعر به سراب واتفاجأ به حقيقه

يعني يوم البعد قصده ليه قرب ثم غاب
ليه جدد لي جروح كانت بقلبي عميقه

لو يقول الذنب ذنبي بفرض لنفسي عقاب
ذنب سويته ولازم أمسحه بأية طريقه

لكن اللي رافع ضغطي وخلا الشعر شاب
أن ماجا ذنب مني يستحق بعده دقيقه

من غلاه أشقيت نفسي دون ماطمع في ثواب
أفعل اللي هو يطيقه وأترك اللي مايطيقه

لو طلبني العمر كله قلت مطلوبه يجاب
وش هي أعذار الصديق إذا تخلى عن صديقه

هو وانا كانت محبتنا على حد السحاب
كن اهو والله شقيقي وكن انا والله شقيقه

أشهد ان العين ذابت واشهد ان القلب ذاب
والنفس عقبه زفيره كنه يعاند شهيقه

ماترك لي في غيابه غير طعنه واغتراب
تنزف جروح المحبه والأحاسيس الرقيقه

ياعسى ألقى إجابه تكشف أسرار الغياب
وتنشل ببحري بقايا اسئله طاحت غريقه

اسألوا ناسي عشيقه ليه ظني فيه خاب
كيف جاله قلب ينسى ولا يتناسى عشيقه

اسألوا من هو عشقته بعدها ردوا جواب
بمكن يداوي جروح باتت بقلبي عميقه