تواسيني وانا الميت وحالي يجبر الدمعات
تسيل من الذي فيني وتبكي وهي تواسيني
وانا ابكي واتنهد وارسم بالحزن لوحات
يجبروني عشان امشي ورجلي ما تمشيني
قتلت رعايتي بيدي قتلت الحب والرحمات
حرمت النفس من حقها وانا ابكيها وتبكيني
وكاني بحلم قدامي يقيدني من الصرخات
اريد اصحى ولكن مالقيت اللي يصحيني
فداك القلب يايمه ومهما قلت من كلمات
صغيره في كبر حقك بس اتمنى تعذريني
نهبت الفرحه من بيتي ..اني خسيس الذات
صحيح اني ولد طايش وكل ما اريده يجيني
تجول عيونهم فيني تفصل مني قياسات
وتشيح وجوههم عني وكني غيرت ديني
يظنوا حزنهم اكبر وهم اصحاب هالمأساة
وانا اتحدى اذا فيهم ربع ما يحترق فيني
نقص قدري بعد موتك وغابت نشوة اللذات
وصار الهم عكازي ابكيه ويباكيني
عطيتيني بدون حساب ولا سمعتك تقولي هات
وانا اللي شربت من دمك ودمك يناديني
يايمه ارجعي خلاص..اجلس معك لو لحظات
واقبل ايدك ورجلك وافرش لك رمش عيني
يايمه ما تحملهم يقولوا فات ما قد مات
تعالي غيري هالقول واطيعك باقي سنيني
واترك عادة التدخين وانفذ ما تبي بسكات
واصلي الفجر في المسجد قبل ماانت تصحيني
يايمه ارجعي تكفين وطفي شمعة الآهات
ابيك انتي ولا غيرك على موتك تعزيني
وضميني وداويني مثل ما كانت هذيك الساعات
مااريد احد يواسيني اريد انتي تواسيني
دخيلك بس لا تبكي اذا شفتي بي الدمعات
انا مااقوى ابكيك اذا انتي تبكيني
