الدخول المدرسي ..... هههههههههههههه

السلام عليكم
رافد قلمي الرصاصي و قاعد نخمم ... تفكرت بلي رانا مع الدخلة تاع ليكول ...
جا في بالي ندير هاد الموضوع و هو مخصص للاطفال لي أول مرة يدخلو للمدرسة ...
يا ولد تخايل تكون قاعد هاكدا تخمم في سبيدرمان و لي ميكي لي راح يلعبو اليوم
حتى جي ليك ماماك و تقولك يا وليدي راك كبرت الله يبارك ولا في عمرك 6 سنين و نتاجك قاع راح يدخلو للمدرسة
و نتا غدوة راح ندخلوك من بعد نتا تولي في حالة واش نقولك قلبك يخبط تقول الموت راهي تبيـpـيلك
وجهك يولي اصفر و تحمكك ...... (حشاكم) تتفكر كي كنت اديرها تحتك و نتا بيبي هههههه
النفس يروحلك تنشف , الهدرة تروحلك
تولي عـgـون وصل وقت لفطور ماماك راهي تعيطلك باه تفطر بصح نتا لاpـيتي راحتلك قاع فالماكلة ... جي ليك ماماك و تقولك يا وليدي ارواح تاكل و نتا
ماتردش و تقولك واش صرالك يا وليدي وشبيك ...
مسكينة ماعلابالهاش تروح هي عند باباك و هي تبكي و تقولو وليدنا كاشما صرالو ...
يقوللها ايا ندوه للطبيب و كي يدوك للطبيب ...
يقوللهم الطبيب وليدكم فقد الذاكرة و لازملو مدة باه يبرا حتى تطرطق مامك ملهيه بالبكاء ...
و تقول يا يمى على وليدي مسكين ضربوهولي بعين ههههههه
و نتوما موليين للدار حتى يشريلك باباك سبيدرمان و يقولك هاك وليدي ياك تحبو بصح نتا لا حياة لمن تنادي
يقول باباك نصبرو وخلاص و ربي يشافيه ان شاء الله
راهي جات لعشية و نتوما ملمومين قدام التيليفزيون تتفرجو فاليتيمة حتى تبدا ناس ملاح سيتي ...
و زهرك يطيح فالحلقة تاع كي تقريهم بيونة ههههه
تما نتا تتفرج من الصدمة كي تشوف ليكول توليلك الذاكرة و توليلك الهدرة
و تقوللهم مانروحش ليكول شوفو الشيخة كيفاه راهي تضرب فيهم نتا تقصد على بيونة
تقولك لالا هادو راهم يمثلو برك بصح فالمدرسة مايديرولك والو ...
راه وصل الليل جا وقت الرقاد نتا سي نورمال مايجيكش النوم تبدا تخمم شغل رايح للحرب هههه
راه طلع النهار و وصل اليوم الموعود باباك و ماماك يقولولك ارواح ...
نتا ماتحبش تروح تقوللهم الشيخة تضربني ...
يبدا يكركر فيك باباك برا يقولك فكرتني فالكبش تاع العيد كي نجيبو و مايحبش يمشي هههههه
وصلتو للمدرسة و جي المعلمة تاعك نتا خلاص مايبقا فيك والو ...
الشيخة تقوللهم وشبيه الطفل ماماك تقوللها راه خايف تضربيه ....
مبعدة الشيخة تاعك تبدا تضحك هاديك الضحكة الصفرة هيهيهيهيهيهيه
تقوللها وليدكم راه كي وليدي ... يروحو والديك ... تبقى غير نتا و المعلمة ...
كي تدخلو للقسم تلقاه معمر كاين غير بلاصة فارغة ...
بصح فالطاولة هاديك يقعد فيها الهندي ... و الهندي هادا قصتو قصة
هادا هو العام 10 تاعو فالسنة الأولى هههههه راه مـgـاجي
يعني عندو خبرة فالطوايش و الحروب و راه قديم على المدير فالمؤسسة ههههههههه ...
يعني يعرف المدرسة حجرة بحجرة تقولك المعلمة ريح معاه ...
نتا راك مريح تبدا تقرا فالطاولة اسماء التلاميذ لي ريحو تما و تقرا التواريخ لي تكتبو فيها غير فـ 1990 و 1995
..... تقولو شكون هادو يقولك الهندي هادو لي سبقوني هنا و انا الخليفة تاعهم
هاد لبلاصة تاع لجدود و خلاوهالي امانة و انا مابقاليش بزاف يحاوزوني
و راح نخليلك هاد لبلاصة امانة في رقبتك ...
و يقولك بصح لازم نديرلك اختبار ... و لازم تنجح
يبدا يعلمك التفتافة ... كيفاه تسرق الستيلوات ... كيفاه دير الأصوات ...................
مبعدة وصل وقت الصح ...
يقولك لازم دير خيط تتعكل عليه الشيخة ... و ادا نجحت رايح تولي الخليفة هنا في هاد لبلاصة
نتا لعشية من داك دير الخيط و طيح الشيخة يدوها للسبيطار
يجي ليك الهندي و يقولك ارفع راسك ارفع راسك ....
راني رايح و مانخافش عليك تقولو واش نجحت؟ ....
يقولك ايييييييييه نتا تروح للدار فرحااااااااااااااااااااااان و تقول نجحت نجحت ...
ماماك تفرح علابالها كاشما قريت مليح تقولك واش وليدي فاش نجحت؟ ...
تقوللها انا لي رايح نخلف بلاصة الهندي هههههههههههههههههههههههههههههههه

و نزيدلكم نكتة من عندي ...
قالك مرة طفلة راحت للمدرسة بطبلية برتقالية خرجوها و قالولها لازم جيبي روز هي مافهمتش مليح راحت ليماها قالتها قالولنا لازم جيبو الروز راحت شرات كيلو روز و راحت بيه ههههههههه و في الأخير أهدي هذا العمل لكل أصحاب المآزر الزرقاء و الوردية ههههههه
♥aminovic91♥