هـاذ القصيــدة وسمهـــا الصبر مافيهاش موضوع واحد نطرحو
وانما رايح نحــاول بـــاش نهدر على ناس كثير فـــالدنيا نجـرحو
كاين الصّبر مع الوقــــت ينجبر هذاك ايجــي يوم يلـــقى مفتاحو
و كاين الصبر الي مولاه ينقهـر يشد يشد حتــى نهـــــار يطيّـحو
و كاين صبر الي يربط لحــجر فبطنو مالجوع باه يصبر روحو
وكاين الصبر الي يوصّــل للقبر هذاك امـــاليه عمرهم ما يريحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
و كــاين صبـر الي بعقلو يفكر هذاك يتســمى يعرف صــلاحو
يشوف بلي هاذ الدنيا كيف لبحر او ليـــام أمواج يجـــوا ويروحو
ايلا ماشي ليــوم كاين يوم اخر راه العام طويل لا نحبوا نربحو
ولمكتوب فالجبين مقضي ومقدّر وعمرها اليدين ما تقدر تمســحو
وكاين الصبر الي مُولاه ينقــهر كيما لمسلمين في أحد كي طاحو
شافوا بلي الجيش راهو منتصر هبطوا من لجبل يشاركوه فراحو
هذا يغتــــانم و يهلـــل و يكبر خالف أمر الرسول وحط رماحو
و ابن الوليـد ولو كــــان خـاسر عرف يصبر وما حطش سلاحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا صبـر ليتيم الي فعز الصغر تنحرم من والديـه خلاّوه وراحو
شكون الي راح يفهمو كي يهدر ولا يمسحلو دموعو كي يطيــحو
قلّب هاذ الدنيا ما لقاش وحداخر يحبو كي والديه ويحبلو صلاحو
وفي صبحة العيــد الناس تتغافر وهو ما يلقى غير قبرهم يمسحو
ويجي ذاك النهار او ليتيم يتبشر برحمة فـــالدنيا يحبـــها وتريحو
زوجة صالحة ومنوّرة كي لقمر وتجيبلو ذريــــة و كامل يصلحو
ويعود يحمـــد في ربــي ويشكر ويذكرو سبحانو يعبدو ويسبّـحو
والحاجة الي ذاقــها هو فالصغر ما يخليش ولادو فيــــها يطيحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف صبر النـــبي المبشر عليه الصلاة والسلام هو بروحو
تربي يتيم ومصغرو عليـه تقدر الناس الي يحبـــهم كامل يروحو
ولاشوف حتى الي زوجتو عاقر ولا حتــى كــان العقم في روحو
هاذو سنين وسنين وهـو ينتاظر فذاك المولود وموجدّلو مطراحو
ولما شاف روحو بلي بدى يكبر والصوالح الي جربهم ما نجــحو
لتما حمـــد الله ورضى بالقـــدر وتكفّل بيتيـــم يونس بيـــه روحو
وعمل حساب لذاك اليـوم الآخر اليوم الي فيـه لبـــواب يتفتحو
يدخل للجنة هــو وخيـــر البشر كتف لكتـف كيـــف كيف يروحو
وزوجتو ثان عندها نفس الاجر في جنة وحـــدة كــــــامل يريحو
والعالم باليتامى والله راه معمر كفلوا واحد واحد لا بغيتو تربحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف صبر السجين تنحشر وهو بريء متـــــأكد من روحو
شكون يسمعلو الأدلة الي تهدر والادلة ضــدو بلاوي او طــاحو
يشوف في ليـام تضيع من لعمر وهو ما يفرقش ليـلو من صباحو
يسبح ويذكـــــر وحلــمو يتحرر ويدعي فالله باه يطـــلق صراحو
ويقرى سورة يوسـف او يعتابر لما خرج مالسجن الملك رشـحو
باش يكون حاكم خزاين ماصر ويجو ليه والديه كيـما نام روحو
ويلحق ذاك النهار الطيـر يفرفر يعلي فالســـما ويفتـــح جنــــاحو
ربي يعوضو على كـل ما صبر ويخلفلو كــامل ليــــام الي راحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف لمريض الي جاه خبر حتى الطبيب حار كيفاه يصارحو
بلي ما بقالــــوش يزيـــد فلـعمر وليام الجـايين مش قد الي راحو
فهم ذاك لمريــض ولتــــما قرر باش يبدا يوجد وينقي فـي روحو
وعارف بلي ربي سبحـانو يغفر للمريض وذنــوبو كامل يتمسحو
والموت بيد الله قضــــــاء وقدر وحدو الي يعلم وقتــــاش نروحو
برحمتو سبحـــــــانو راهو قادر فدقيقة المرضة يشفـــاو ويريحو
وهو سبحـــــانو تعالى الي بشر كامل الصــــابرين الي اذا طاحو
فمصيبة ردوهــا للقضاء والقدر وقالوا ان لله وليه نعاودو نروحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
تأليف فيصل كرشوش
كل الحقوق محفوظة
وانما رايح نحــاول بـــاش نهدر على ناس كثير فـــالدنيا نجـرحو
كاين الصّبر مع الوقــــت ينجبر هذاك ايجــي يوم يلـــقى مفتاحو
و كاين الصبر الي مولاه ينقهـر يشد يشد حتــى نهـــــار يطيّـحو
و كاين صبر الي يربط لحــجر فبطنو مالجوع باه يصبر روحو
وكاين الصبر الي يوصّــل للقبر هذاك امـــاليه عمرهم ما يريحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
و كــاين صبـر الي بعقلو يفكر هذاك يتســمى يعرف صــلاحو
يشوف بلي هاذ الدنيا كيف لبحر او ليـــام أمواج يجـــوا ويروحو
ايلا ماشي ليــوم كاين يوم اخر راه العام طويل لا نحبوا نربحو
ولمكتوب فالجبين مقضي ومقدّر وعمرها اليدين ما تقدر تمســحو
وكاين الصبر الي مُولاه ينقــهر كيما لمسلمين في أحد كي طاحو
شافوا بلي الجيش راهو منتصر هبطوا من لجبل يشاركوه فراحو
هذا يغتــــانم و يهلـــل و يكبر خالف أمر الرسول وحط رماحو
و ابن الوليـد ولو كــــان خـاسر عرف يصبر وما حطش سلاحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا صبـر ليتيم الي فعز الصغر تنحرم من والديـه خلاّوه وراحو
شكون الي راح يفهمو كي يهدر ولا يمسحلو دموعو كي يطيــحو
قلّب هاذ الدنيا ما لقاش وحداخر يحبو كي والديه ويحبلو صلاحو
وفي صبحة العيــد الناس تتغافر وهو ما يلقى غير قبرهم يمسحو
ويجي ذاك النهار او ليتيم يتبشر برحمة فـــالدنيا يحبـــها وتريحو
زوجة صالحة ومنوّرة كي لقمر وتجيبلو ذريــــة و كامل يصلحو
ويعود يحمـــد في ربــي ويشكر ويذكرو سبحانو يعبدو ويسبّـحو
والحاجة الي ذاقــها هو فالصغر ما يخليش ولادو فيــــها يطيحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف صبر النـــبي المبشر عليه الصلاة والسلام هو بروحو
تربي يتيم ومصغرو عليـه تقدر الناس الي يحبـــهم كامل يروحو
ولاشوف حتى الي زوجتو عاقر ولا حتــى كــان العقم في روحو
هاذو سنين وسنين وهـو ينتاظر فذاك المولود وموجدّلو مطراحو
ولما شاف روحو بلي بدى يكبر والصوالح الي جربهم ما نجــحو
لتما حمـــد الله ورضى بالقـــدر وتكفّل بيتيـــم يونس بيـــه روحو
وعمل حساب لذاك اليـوم الآخر اليوم الي فيـه لبـــواب يتفتحو
يدخل للجنة هــو وخيـــر البشر كتف لكتـف كيـــف كيف يروحو
وزوجتو ثان عندها نفس الاجر في جنة وحـــدة كــــــامل يريحو
والعالم باليتامى والله راه معمر كفلوا واحد واحد لا بغيتو تربحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف صبر السجين تنحشر وهو بريء متـــــأكد من روحو
شكون يسمعلو الأدلة الي تهدر والادلة ضــدو بلاوي او طــاحو
يشوف في ليـام تضيع من لعمر وهو ما يفرقش ليـلو من صباحو
يسبح ويذكـــــر وحلــمو يتحرر ويدعي فالله باه يطـــلق صراحو
ويقرى سورة يوسـف او يعتابر لما خرج مالسجن الملك رشـحو
باش يكون حاكم خزاين ماصر ويجو ليه والديه كيـما نام روحو
ويلحق ذاك النهار الطيـر يفرفر يعلي فالســـما ويفتـــح جنــــاحو
ربي يعوضو على كـل ما صبر ويخلفلو كــامل ليــــام الي راحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
ولا شوف لمريض الي جاه خبر حتى الطبيب حار كيفاه يصارحو
بلي ما بقالــــوش يزيـــد فلـعمر وليام الجـايين مش قد الي راحو
فهم ذاك لمريــض ولتــــما قرر باش يبدا يوجد وينقي فـي روحو
وعارف بلي ربي سبحـانو يغفر للمريض وذنــوبو كامل يتمسحو
والموت بيد الله قضــــــاء وقدر وحدو الي يعلم وقتــــاش نروحو
برحمتو سبحـــــــانو راهو قادر فدقيقة المرضة يشفـــاو ويريحو
وهو سبحـــــانو تعالى الي بشر كامل الصــــابرين الي اذا طاحو
فمصيبة ردوهــا للقضاء والقدر وقالوا ان لله وليه نعاودو نروحو
وشكــون درك الّـــي عاد يصبر كيما ايوب على لبـــلاوي طاحو
ولا صبر يعقوب للقضاء والقدر وتنعماو عينيه من كثــرة نواحو
تأليف فيصل كرشوش
كل الحقوق محفوظة
